1308 கண்ணார்கடல்போல் திருமேனிகரியாய்! *

நண்ணார்முனை வென்றிகொள்வார் மன்னுநாங்கூர் *

திண்ணார்மதிள்சூழ் திருவெள்ளக்குளத்துள்

அண்ணா! * அடியேனிடரைக்களையாயே. (2)

1309 கொந்தார்துளவமலர்கொன்டு அணிவானே! *

நந்தாதபெரும்புகழ் வேதியர்நாங்கூர் *

செந்தாமரைநீர்த் திருவெள்ளக்குளத்துள்

எந்தாய்! * அடியேனிடரைக்களையாயே.

1310 குன்றால்குளிர்மாரி தடுத்துஉகந்தானே! *

நன்றாயபெரும்புகழ் வேதியர்நாங்கூர் *

சென்றார்வணங்கும் திருவெள்ளக்குளத்துள்

நின்றாய்! * நெடியாய்! அடியேனிடர்நீக்கே.

1311 கானார்கரிகொம்பது ஒசித்தகளிறே! *

நானாவகைநல்லவர் மன்னியநாங்கூர் *

தேனார்பொழில்சூழ் திருவெள்ளக்குளத்து

ளானாய் * அடியேனுக்கு அருள்புரியாயே.

1312 வேடார்திருவேங்கடம் மேயவிளக்கே! *

நாடார்புகழ்வேதியர் மன்னியநாங்கூர் *

சேடார்பொழில்சூழ் திருவெள்ளக்குளத்தாய்! *

பாடாவருவேன் வினையாயினபாற்றே. (2)

1313 கல்லால்கடலை அணைகட்டி உகந்தாய்! *

நல்லார்பலர் வேதியர்மன்னியநாங்கூர்ச் *

செல்வா! * திருவெள்ளக்குளத்துஉறைவானே! *

எல்லாவிடரும் கெடுமாறு அருளாயே.

1314 கோலால்நிரைமேய்த்த எங்கோவலர்கோவே! *

நாலாகியவேதியர் மன்னியநாங்கூர் *

சேலார்வயல்சூழ் திருவெள்ளக்குளத்துள்

மாலே! * எனவல்வினை தீர்த்தருளாயே.

1315 வாராகமதாகி இம்மண்ணை இடந்தாய்! *

நாராயணனே! நல்லவேதியர்நாங்கூர் *

சீரார்பொழில்சூழ் திருவெள்ளக்குளத்துள்

ஆராவமுதே! * அடியேற்கு அருளாயே.

1316 பூவார் திருமாமகள் புல்லியமார்பா! *

நாவார்புகழ் வேதியர்மன்னியநாங்கூர் *

தேவா! திருவெள்ளக்குளத்துஉறைவானே! *

ஆவா! அடியான் இவனென்றுஅருளாயே.

1317 நல்லன்புடை வேதியர்மன்னியநாங்கூர் *

செல்வன் திருவெள்ளக்குளத்துஉறைவானை *

கல்லின்மலிதோள் கலியன்சொன்னமாலை *

வல்லரெனவல்லவர் வானவர்தாமே. (2)