1358 தாம்தம்பெருமையறியார் * தூது

வேந்தர்க்காய வேந்தரூர்போல் *

காந்தள்விரல் மென்கலைநன்மடவார் *

கூந்தல்கமழும் கூட லூரே. (2)

1359 செறுந்திண்திமிலேறுடைய * பின்னை

பெறும்தண்கோலம் பெற்றாரூர்போல் *

நறுந்தண்தீந்தேன் உண்டவண்டு *

குறிஞ்சிபாடும் கூட லூரே.

1360 பிள்ளையுருவாய்த் தயிருண்டு * அடியே

னுள்ளம்புகுந்த ஒருவரூர்போல் *

கள்ளநாரை வயலுள் * கயல்மீன்

கொள்ளைகொள்ளும் கூட லூரே.

1361 கூற்றேருருவின் குறளாய் * நிலம்நீர்

ஏற்றான் எந்தைபெருமானூர்போல் *

சேற்றேருழவர் கோதைப்போதூண் *

கோல்தேன்முரலும் கூட லூரே.

1362 தொண்டர்பரவச் சுடர்சென்றணவ *

அண்டத்துஅமரும் அடிகளூர்போல் *

வண்டலலையுள் கெண்டைமிளிர *

கொண்டலதிரும் கூட லூரே.

1363 தக்கன்வேள்வி தகர்த்ததலைவன் *

துக்கம்துடைத்த துணைவரூர்போல் *

எக்கலிடு நுண்மணல்மேல் * எங்கும்

கொக்கின்பழம்வீழ் கூட லூரே.

1364 கருந்தண்கடலும் மலையும்உலகும் *

அருந்தும்அடிகள் அமரும்ஊர்போல் *

பெருந்தண்முல்லைப் பிள்ளையோடி *

குருந்தம்தழுவும் கூட லூரே.

1365 கலைவாழ்பிணையோடு அணையும் * திருநீர்

மலைவாழ்எந்தை மருவும்ஊர்போல் *

இலைதாழ்தெங்கின் மேல்நின்று * இளநீர்க்

குலைதாழ்கிடங்கின் கூட லூரே.

1366 பெருகுகாதல் அடியேனுள்ளம் *

உருகப்புகுந்த ஒருவரூர்போல் *

அருகு கைதைமலர * கெண்டை

குருகென்றஞ்சும் கூட லூரே.

1367 காவிப்பெருநீர்வண்ணன் * கண்ணன்

மேவித்திகழும் கூடலூர்மேல் *

கோவைத்தமிழால் கலியன்சொன்ன *

பாவைப்பாடப் பாவம்போமே (2)