1922 காதில்கடிப்பிட்டுக் கலிங்கமுடுத்து *

தாதுநல்லதண்ணந்துழாய் கொடணிந்து *

போதுமறுத்துப் புறமேவந்துநின்றீர் *

ஏதுக்குஇதுவென்? இதுவென்? இதுவென்னோ? (2)

1923 துவராடையுடுத்து ஒருசெண்டுசிலுப்பி *

கவராகமுடித்துக் கலிக்கச்சுக்கட்டி *

சுவரார்கதவின்புறமே வந்துநின்றீர் *

இவரார்? இதுவென்? இதுவென்? இதுவென்னோ?

1924 கருளக்கொடியொன்றுடையீர்! தனிப்பாகீர்! *

உருளச்சகடமது உறக்கில்நிமிர்த்தீர்! *

மருளைக்கொடுபாடிவந்து இல்லம்புகுந்தீர் *

இருளத்துஇதுவென்? இதுவென்? இதுவென்னோ?

1925 நாமம்பலவுமுடை நாரணநம்பீ! *

தாமத்துளவம் மிகநாறிடுகின்றீர் *

காமனெனப்பாடிவந்து இல்லம்புகுந்தீர் *

ஏமத்துஇதுவென்? இதுவென்? இதுவென்னோ?

1926 சுற்றும்குழல்தாழச் சுரிகையணைத்து *

மற்றும்பலமாமணி பொன்கொடணிந்து *

முற்றம்புகுந்து முறுவல்செய்துநின்றீர் *

எற்றுக்குஇதுவென்? இதுவென்? இதுவென்னோ?

1927 ஆனாயரும் ஆநிரையும் அங்கொழிய *

கூனாயதோர் கொற்றவில்லொன்றுகையேந்தி *

போனார்இருந்தாரையும் பார்த்துப்புகுதீர் *

ஏனோர்கள்முன்னென்? இதுவென்? இதுவென்னோ?

1928 மல்லேபொருததிரள்தோள் மணவாளீர்! *

அல்லேயறிந்தோம் நும்மனத்தின்கருத்தை *

சொல்லாதொழியீர் சொன்னபோதினால்வாரீர் *

எல்லே! இதுவென்? இதுவென்? இதுவென்னோ?

1929 புக்காடரவம் பிடித்தாட்டும்புனிதீர் *

இக்காலங்கள் யாம்உமக்குஏதொன்றுமல்லோம் *

தக்கார்பலர் தேவிமார்சாலவுடையீர் *

எக்கே! இதுவென்? இதுவென்? இதுவென்னோ?

1930 ஆடியசைந்து ஆய்மடவாரொடுநீபோய் *

கூடிக்குரவைபிணை கோமளப்பிள்ளாய் *

தேடித்திருமாமகள் மண்மகள்நிற்ப *

ஏடி! இதுவென்? இதுவென்? இதுவென்னோ?

1931 அல்லிக்கமலக்கண்ணனை அங்குஓராய்ச்சி *

எல்லிப்பொழுதூடிய ஊடல்திறத்தை *

கல்லின்மலிதோள் கலியன்சொன்னமாலை *

சொல்லித்துதிப்பாரவர் துக்கமிலரே (2)