534 தெள்ளியார்பலர் கைதொழுந்தேவனார் *

வள்ளல் மாலிருஞ்சோலைமணாளனார் *

பள்ளிகொள்ளுமிடத்து அடிகொட்டிட *

கொள்ளுமாகில் நீகூடிடுகூடலே (2)

535 காட்டில்வேங்கடம் கண்ணபுரநகர் *

வாட்டமின்றி மகிழ்ந்துறைவாமனன் *

ஓட்டராவந்து என்கைப்பற்றி * தன்னொடும்

கூட்டுமாகில் நீகூடிடுகூடலே. (2 )

536 பூமகன்புகழ்வானவர் போற்றுதற்

காமகன் * அணிவாணுதல் தேவகி

மாமகன் * மிகுசீர் வசுதேவர்தம்

கோமகன்வரில் கூடிடுகூடலே.

537 ஆய்ச்சிமார்களும் ஆயருமஞ்சிட *

பூத்தநீள்கடம்பேறிப் புகப்பாய்ந்து *

வாய்த்தகாளியன்மேல் நடமாடிய *

கூத்தனார்வரில் கூடிடுகூடலே.

538 மாடமாளிகை சூழ்மதுரைப்பதி

நாடி * நந்தெருவின் நடுவேவந்திட்டு *

ஓடைமாமதயானை யுதைத்தவன் *

கூடுமாகில் நீ கூடிடுகூடலே.

539 அற்றவன் மருதம்முறியநடை

கற்றவன் * கஞ்சனை வஞ்சனையிற்

செற்றவன் * திகழும் மதுரைப்பதி *

கொற்றவன்வரில் கூடிடுகூடலே.

540 அன்றின்னாதனசெய் சிசுபாலனும் *

நின்றநீள்மருதும் மெருதும்புள்ளும் *

வென்றிவேல்விறல் கஞ்சனும் வீழ * முன்

கொன்றவன்வரில் கூடிடுகூடலே.

541 ஆவலன்புடையார்தம் மனத்தன்றி

மேவலன் * விரைசூழ் துவராபதிக்

காவலன் * கன்றுமேய்த்து விளையாடும் *

கோவலன்வரில் கூடிடுகூடலே.

542 கொண்டகோலக் குறளுருவாய்ச்சென்று *

பண்டுமாவலிதன் பெருவேள்வியில் *

அண்டமும்நிலனும்அடியொன்றினால் *

கொண்டவன்வரில் கூடிடுகூடலே.

543 பழகுநான்மறையின்பொருளாய் * மத

ஒழுகுவாரண முய்யவளித்த * எம்

அழகனார் அணியாய்ச்சியர் சிந்தையுள்

குழகனார் * வரில் கூடிடுகூடலே.

544 ஊடல்கூடல் உணர்தல்புணர்தலை *

நீடுநின்ற நிறைபுகழாய்ச்சியர் *

கூடலைக் குழற்கோதைமுன்கூறிய *

பாடல்பத்தும்வல்லார்க்கு இல்லைபாவமே.